АҚШда ўлим жазосига ҳукм қилинганларнинг ҳар ўн нафардан биттасини ҳарбий ҳаракатларда иштирок этган ветеранлар ташкил этади. Бу ҳақда BuzzFeed News хабар бермоқда.
DPIC (ўлимга ҳукм этилганлар масаласи бўйича ахборот маркази)нинг маълум қилишича, айни вақтда АҚШ қамоқхоналарида ўлимга ҳукм этилганларнинг 300 нафарини ветеранлар ташкил этади. Бу умумий ҳисоб бўйича 10 фоиз демакдир. Ҳуқуқ ҳимоячиларининг айтишича, улар томонидан қилинган жиноятлар ҳарбий ҳаракатларда иштирок эганликлари оқибатида орттирилган посттравматик стрессли касалликлар (ПСК) натижасида содир этилган.
Ветеранлар иши бўйича АҚШ департаментининг маълум қилишича, ПСК билан оғриганларнинг 11 фоизи Ироқ урушида, 20 фоизи Афғонистондаги урушда ва 12 фоизи “Чўлдаги бўрон” ҳарбий операциясида қатнашган ветеранлардир. Таққослаш учун, шуни мисол келтириш мумкинки, Вьетнам урушида қатнашганларнинг 30 фоизи худди шу дард билан оғриган эди.