Тошкент шаҳридаги Сингапур менежментни ривожлантириш институтида 18 ноябрдан 19 ноябрга қадар мўлжалланган маркетинг бўйича халқаро анжуман бўлиб ўтмоқда. Унда миллий компаниялар вакиллари тажриба алмашиш мақсадида ўзларининг турли маркетинг стратегияларини намойиш этишмоқда. Анжуманда ижтимоий маркетинг, корпоратив бренд ва компанияни ҳисобга олиш, истеъмолчи хулқ-атвори, ҳудудий маркетинг ва бошқа масалалар бўйича муҳокамалар бўлиб ўтмоқда.
Рақамли маркетинг борасидаги тақдимот энг кўп муҳокамага сабаб бўлган қизиқарли мавзулардан бири бўлди. Чунки рақамли маркетинг хизматлар ва товарларни интернет ёрдамида рағбатлантирувчи энг кучли воситага айлангани маълум қилинди.
— Ахборот технологиялари бугунги кунда ҳаётимизнинг ажралмас қисмига айланиб бўлди. Шу боис маркетинг ахборот соҳасида муҳим роль ўйнайди ва маълумотларни бирлаштиришда самарали натижа беради, — деди Тошкентдаги Сингапур менежментни рвиожлантириш институти катта менежери Умидахон Нариманова.
Умуман олганда, ташкилотчилар ва тадбир қатнашчилари таъкидлаганидек, ушбу анжуман турли компания ва ташкилотлар ўртасида маркетинг соҳасида тажриба алмашувчи самарали платформага айланди.