Париждаги теракт қурбонлари сони 130 нафарга етди. Терактлар вақтида жароҳатланиб, шифохонага олиб келинганлардан бири жон берди. Бу ҳақда BFM телеканали хабар тарқатди.
13 ноябрь оқшомида Париж шаҳрида юз берган давомли терактлар туфайли жароҳатланиб шифохоналарга олиб келинганларнинг аксари "Батаклан" театрига ҳудум вақтида ўқ тегишидан жароҳат олган.
Олдинги хабарларда улардан 99 нафари кўп қон йўқотиш туфайли оғир аҳволда экани айтилганди.
13 ноябрь куни оқшомида террорчилар Парижда 7та нуқтада ўз мақсадларини амалга оширишди. Аввалига "Стад де Франс" стадиони яқинида портлаш, кейин Сена дарёси бўйидаги кафеларда ўт очилиши, ниҳоят "Батаклан" театрида одамларнинг қирғин қилиниши оқибатида 129 киши ҳалок бўлганди.
Францияда ўша куниёқ фавқулодда режим ҳолати ўрнатилган, 19 ноябрь куни бу режим муҳлати 3 ойга узайтирилган.
Теракт ташкилотчиларидан бири Абдулҳамид Абауд 17 ноябрь куни Сен-Денида ўтказилган аксилтеррор амалиёт вақтида йўқ қилинди.
Яна бир ташкилотчи Салоҳ Абдислом эса бир қатор мамлакатлар бўйлаб қидирилмоқда.