Eagles of Death Metal гуруҳи вакиллари Париждаги теракт воқеаларини эслаб, Vice гуруҳига интервью беришди.
13 ноябрь кунги терактларнинг энг талофатлиси юз берган "Батаклан" театрида ўша куни Eagles of Death Metal гуруҳи концерти ўтказилаётганди. Бу театрга босқин вақтида 89 киши ҳалок бўлди, улар орасида гуруҳнинг мерчандайзинг бўйича менежери Ник Александр ҳам бор.
"Ўша куни ўқдан қочганлар бизнинг гримхонамизга киришди. Лекин жангарилар уларнинг ортидан келиб ҳаммани отиб ташлаган, фақат менинг қора чарм курткам ичига бекитиб қўйилган гўдак омон қолган. Одамлар ўзини ўлганга солиб ётиб олишарди, лекин уларни ҳам отишарди. Қурбонларнинг кўп бўлишига одамлар ўқ еган дўстларини ташлаб кетишни истамасдан, уларнинг ўз гавдалари билан ўқдан тўсишга уринишгани ҳам сабаб бўлди", дея хотирлайди гуруҳ қўшиқчиси Жесси Ҳьюз.
У умид қиладики, Eagles of Death Metal "Батаклан" қайта очилганида биринчи бўлиб концерт беради.
"Мен Парижга қайтишни истайман. Бизнинг дўстларимиз театрга рок-н-ролл эшитиш учун келишганди, бунинг ўрнига жонларини беришди. Мен эса қайтишни ва яшашда давом этаётганимизни кўрсатиб қўйишни истайман", деган мусиқачи.
Гуруҳ асосчиларидан бири Жош Ҳомм Европа бўйлаб турларнинг давом эттирилишини маълум қилган. Айни вақтда Ҳомм Sweet Stuff Foundation жамғармаси ёрдамида теракт қурбонлари учун хайрия маблағлари йиғмоқда.