Украина Туркияга Россия ўрнига ғалла ва кунгабоқар мойини етказиб бериши мумкин. Бу ҳақда Украина ғаллачилик уюшмаси президенти Владимир Клименко маълум қилди, деб хабар бермоқда “Интерфакс-Украина” агентлиги.
“Агар Россия Туркияга етказиб беришларни тўхтатса, унда Украина у ерга маҳсулот етказиб бериши мумкин. Бизда у ерга олиб борса бўладиган маҳсулотлар бор. Нафақат буғдой ва макка дони, балки кунгабоқар мойини ҳам етказиб беришимиз мумкин”, деб айтди Клименко.
Агентликка “ААА” консалтинг компанияси таҳлилий бўлими бошлиғи Мария Колесник таҳлилий фикрни билдирди.
“Украина буғдойи бўшаётган бўшлиқни эгаллаши мумкин. Бизнинг озиқ-овқат ғалламизнинг сифати юқори, шунинг учун агар шундай зарурат пайдо бўлса, бизнинг трейдерлар тезда бунга жавоб беришади”, деб айтди Колесник.
Россиянинг собиқ молия вазири Алексей Кудриннинг фикрича, Туркияга қарши санкциялар Россиянинг ўзига зиён келтириши мумкин, шунинг учун бу масалага эҳтиёткорлик билан ёндашиш лозим.
Россия бош вазири Дмитрий Медведев ҳукуматга Туркия томонидан Су-24 ҳарбий самолётининг уриб туширилишига жавобан Туркияга қарши иқтисодий ва гуманитар чоралар мажмуасини ишлаб чиқиш вазифасини юклади.