"Реал" Испания кубоги-2015/16 мусобақасида иштирок этишдан маҳрум этилди

Мадриднинг “Реал” жамоаси “Кадис”га қарши ўйинда россиялик ярим ҳимоячи Денис Черишевнинг иштироки боис Испания кубоги-2015/16 мусобақасидан четлаштирилди. Бу ҳақда Cadena SER радиостанцияси маълум қилган.

“Кадис” билан бўлиб ўтган учрашув 2 декабрда ўтказилган. Унда Черишев бир бўлим иштирок этиб, 3-дақиқада тўп киритган.

Россиялик футболчи дисквалификация туфайли ушбу ўйинда иштирок этиши мумкин эмас эди. У “Вильярреал” таркибида учта сариқ карточка олган, шу боис қайси жамоа таркибига қўшилишидан қатъий назар битта ўйин ўтказиб юбориши лозим эди.

Ўйин якунига етгач қироллик клуби вакиллари россиялик ярим ҳимоячининг дисквалификацияси борлигини Испания футбол федерациясига тасдиқлаган.