Республикачилар АҚШ президенти Барак Обаманинг миллатга мурожаатидан норози бўлиб, нутқни танқид остига олдилар. The New York Times нашрининг ёзишича, улар Обамани ИШИД олдида кучсизликда, қурол-яроғ назорати масаласида нотўғри позицияда туриш ҳамда энг муҳим масалаларда иродасизлик қилаётганда айбламоқда.
Флорида штати сенатори Марко Рубио айни пайтда фуқаролар саросимада эканлигини, президентнинг чиқиши эса уларни тинчлантира олмаганини таъкидламоқда.
“У ИШИДга қарши курашаётган коалиция борлигига чин дилдан ишонмоқда. Бу бўлмаган гап. Ҳеч қандай коалиция йўқ. Бир парча қоғозга имзо қўйишга рози бўлган бир қанча давлат бор, холос”, - деди Рубио.
Миллатга мурожаат бошланишидан аввалроқ республикачи Тед Круз Обамани “радикал ислом террорчилиги” атамасидан фойдаланишга кўндирмоқчи бўлди. Обама бу таклифни рад этиб, бундай эътирофлар мусулмонларни қора рангда кўрсатишга хизмат қилишини таъкидлади. Кейинчалик Круз президентдан “ёвузлик устидан ғалаба қозониш учун қатъий чоралар режасини” тақдим этишни талаб қилди.
Шунингдек, у давлат раҳбари Сан-Бернардинодаги оммавий қотилликни қурол-яроғ савдоси билан нотўғри боғлаганини таъкидлади. Крузнинг фикрича, терактларни тўхтатиш учун АҚШ қочқинларни қабул қилишни тўхтатиши лозим.