Қорақалпоғистонлик эркак маъшуқасининг пуллари ва тақинчоқларини ўғирлаб кетди. Бу ҳақда “Огоҳ” газетаси хабар бермоқда.
1973 йили Қорақалпоғистонда туғилган Зоир Абдураҳмонов муқаддам судланган ва рўзғоридан ажрашган эди. У Тошкентнинг Яшнобод туманига ташриф буюриб, бу ерда Тамара Чурсина исмли аёл билан яшай бошлаган.
Чурсина Хитойдаги сафари чоғида Тян исмли эркакка турмушга чиққан, аммо ажрашиб кетган эди. Аммо ораларида фарзанд бўлгани боис хитойлик эркак унга пул жўнатиб турган. Мана шу пуллардан йиғиб, аёл 20 минг доллар тўплаб қўйган эди.
Бир куни у қандайдир сабаб билан пулларни банкдаги ҳисобидан ечиб олган. Ўша куни уйда зиёфат уюштирилиб, кўплаб меҳмонлар ташриф буюрган, Чурсина маст бўлиб, ухлаб қолган. Вазиятдан фойдаланиб, Абдураҳмонов пулларни ўғирлаб қочиб кетган. Бироз муддат ўтгач, у қайтиб келган ва аёлни алдаб, пулларни қайтаришни ваъда қилиб, ярашиб олган.
Аммо бир неча ойдан сўнг ўғирлик такрорланган. Чурсина Хитойга кетиш олдидан ҳар эҳтимолга қарши тилла буюмларини яшириб кетган. Қайтганида эса Абдураҳмонов сейфни бузиб, 47 млн сўмлик 53 хилдаги тақинчоқларни ўғирлаб яна ғойиб бўлганини билган.
Чурсина тезда тегишли идораларга хабар берган. Абдураҳмонов қўлга олиниб, пуллар ва моддий қимматликлар эгасига қайтарилган. Иш судга оширилган.