Печ университетида ишловчи венгриялик тарихчи Норберт Пап Усмонлилар султони Сулаймон Қонунийнинг қабри топилганини эълон қилди. Бу ҳақда Associated Press агентлиги хабар бермоқда.
Усмонлиларнинг энг қудратли ҳукмдорларидан бири, ҳашаматли ҳаёт кечиргани учун Муҳташам лақабини олган Сулаймон I 1566 йили Венгриядаги Сигетвар қасрини қамал қилиш чоғида оламдан ўтган. Тарихчининг таъкидлашича, унинг қабри ўша кунларда шоҳона чодир тикилган жойда бўлиши керак.
Шунга қарамай, гипотеза тасдиқланиши учун қазилма ишларини давом эттириш лозим, янги қазиш мавсуми эса 2016 йил баҳоридан бошланади.
Сулаймон I 71 йиллик умрининг 46 йилини тахтда ўтказган. Унинг даврида салтанат янада кенгайган ва бойиган. У вафот этганидан сўнг Сигетвар қамали тўхтаб қолмаслиги учун ўлими 48 кун давомида сир тутилган. Тахмин қилинишича, унинг ички аъзолари шу ҳудудда дафн этилган, танаси эса Истанбулга юборилиб, Сулаймония масжиди қабристонига дафн этилган. Венгриядаги тахминий қабр бугунги Турбек шаҳарчаси ҳудудига тўғри келади.
Сулаймон I унинг ҳукмронлик йиллари акс эттирилган “Муҳташам юз йил” телесериали орқали кенг оммага машҳур бўлган.