Америкалик Женис Жоплинга тегишли бўлган 1964 йил ишлаб чиқарилган Porsche 356 Cabriolet спорткари Нью-Йоркда ўтказилган RM Auctions савдосида 1 миллион 760 минг долларга сотилди. Бошида аукцион ташкилотчилари машинани 400-600 минг долларга сотишни режалаштиришган эди.
Женис Жоплин ушбу спорткарни 1968 йилда Беверли-Хиллздан сотиб олган эди. Бошида кулранг тусдабўлган ушбу автомобиль унга 3,5 минг долларга тушганди. Қўшиқчи қўшимчасига уни безаб берган рассомга 500 доллар берган.
У машинасига Big Brother and the Holding Company гуруҳи аъзоларининг тасвирини қумли пейзаж ва астрологик рамзлар билан уйғунликда чиздирган эди. Картина “Олам тарихи” (History of the Universe) деб ном олган эди.
Қўшиқчи ушбу машинани икки йил давомида бошқарди. “Порше” 1970 йилда у ҳалок бўлган Голливуддаги меҳмонхона авто тураргоҳидан топилган. Жениснинг оиласи 1973 йилда машинани қўлга киритади.
