Эль Чапо лақабли мексикалик наркобарон Хоакин Гузман Лоэра ИШИД етакчиси Абу Бакр ал-Бағдодийга таҳдид қилиб мактуб ёзгани ҳақидаги хабар ёлғон бўлиб чиқди. Бу ҳақда The Independent нашри маълум қилди.
Мактуб ҳақидаги хабар дастлаб 30 ноябрда, баъзида ўйлаб топилган хабарлар чоп этадиган Thug Life Videos сайтида пайдо бўлди. Эксклюзив материал сифатида берилган бу хабарда “Дунёдаги энг катта картелнинг номдор етакчиси “Менинг одамларим сенларни йўқ қилади” деб ИШИДга таҳдид қилган” деб ёзилган.
Таъкидланишича, кодланган ушбу хабар Эл Чапонинг ўғли томонидан электрон почта орқали ал-Боғдодийга юборилган. Ушбу мактуб мазмуни билан июлда қамоқхонадан қочиб кетган Эл Чапо бошқарган “Синалоа” картели билан яқин алоқаларга эга бўлган мексикалик блогер гўёки танишиб чиққани маълум қилинган.
Унинг тушунтиришича, “Синалоа” Яқин Шарққа гиёҳванд моддалар етказиб берувчи гуруҳлардан бири бўлиб, ИШИД гиёҳвандфурушларга халақит берган.
7 декабрда бу далиллар наркокартеллар ҳақидаги янгиликлар портали CartelBlog.com’да чоп этилган. Шундан кейин бу хабар New York Post, Forbes ва Fox News’да ҳам пайдо бўлган.
Thug Life Videos ходими Стив Чарнок The Daily Mail нашрига у ўзининг бошлиғи билан бу воқеани ўйлаб топганини айтган. “Бу бир ҳажвия, сохта янгилик эди” деб айтди Чарнок. Чарнок у билан ҳеч ким бу маълумотни текшириб кўриш учун боғланмаганини қўшимча қилди.