Ўзбекистондаги иккита йирик цемент заводи – «Қизилқумцемент» ва “Бекободцемент” АЖлари давлат активлари (51 фоиз) “Ўзқурилишматериаллар” АЖ устав капиталига берилди.
Ўзбекистон Вазирлар Маҳкамасининг 2015 йил 9 октябрдаги “Давлат мулки объектларидан самарали ва оқилона фойдаланиш бўйича қўшимча чора-тадбирлар тўғрисида”ги қарорига кўра, акционерлик жамиятлари томонидан дивидендлар ҳисобланиши Молия вазирлиги билан келишилган ҳолда амалга оширилади.
“Қизилқумцемент” АЖ Ўзбекистондаги энг ёш цемент ишлаб чиқарувчи корхона ҳисобланади. У 1978 йилда ташкил этилган. Корхона ўз маҳсулотининг ярмидан кўпини, яъни 3 млн тоннадан кўпроқ цементни тежамкор қуруқ усулда ишлаб чиқаради. Компания маълумотларига кўра, корхона 2014 йилда 176 млрд сўм соф фойда олган. Бу Ўзбекистон саноат корхоналари орасида энг юқори кўрсаткични ташкил қилади.
Жорий йилнинг апрелида Ўзбекистон Президенти Ислом Каримов давлат активлари хорижий инвесторларга сотиш учун таклиф қилинадиган 68 та корхона рўйхатини тасдиқлаганди.
Бу рўйхатга “Қизилқумцемент”нинг 35,9 фоиз улуши ҳам киритилган. Бу акцияларни Германиянинг Heidelberg Cement AG корхонаси сотиб олишни кўриб чиқмоқда. Бу ҳақда Тошкентда ўтган Халқаро инвестицион форумда компания ижрочи директори Андреас Керн айтиб ўтганди.
Тармоқдаги энг кекса корхона – Бекобод цемент заводи йилига 800 минг тонна ва ундан кўпроқ цемент ишлаб чиқаришга мўлжалланган.
Цемент қурилиш материаллари саноатида катта улушни (76 фоизни) ташкил қилмоқда.
Ўзбекистонда цемент ишлаб чиқариш ҳажми 2002-2014 йиллар ичида 3,7 млн тоннадан 7,5 млн тоннагача ошган.