Шу йилнинг сентябрь ойи охирида "Толибон" жангарилари Афғонистон шимолидаги Қундуз шаҳрини босиб олиш жараёнида ва шаҳар эгаллаб турилган 1 ҳафтадан ошиқ вақт давомида (28 сентябрдан 13 октябргача) амалга оширилган ҳарбий ҳаракатлар туфайли 289 киши ҳалок бўлган. Шунингдек, бу 1 ҳафта ичида 559 киши турли даражада жароҳатлар олган. Бу ҳақда БМТ ҳисоботида маълум қилинди.
Маълум қилинишича, бу миқдор ичига АҚШ самолёти томонидан хатолик туфайли "Чегара билмас шифокорлар" шифохонасига қилинган ҳужум туфайли оламдан ўтган 42 киши ҳам киритилган.
Қундуздаги вазиятни текширган миссия ходимларининг қайд этишича, тадқиқот ишларини олиб бориш ўлкадаги хавфли вазият туфайли бир мунча қийин кечган. Шунинг учун, талофатлар бундан ҳам кўп бўлиши мумкин.
Ҳалок бўлганларнинг аксари (Шифохонага авиазарба берилишидан ташқари) отишмалар вақтида ва портлашлар туфайли жон берган.
Бир неча кун олдин, Афғонистон миллий хавфсизлик директорати бошлиғи Раҳматилла Набиля Қундуздаги вазият туфайли истеъфога чиққани маълум бўлганди.
Германия федератив республикаси Мудофаа вазири Урсула фон дер Ляйен Мозори-Шариф шаҳрига қилган ташрифи вақтида Халқаро коалиция Афғонистондан чиқиши ҳақида барвақт маълум қилиб юборгани жиддий хато бўлганини тан олганди.
Бироз олдинроқ, Ашхободдаги халқаро анжуман вақтида Ўзбекистон президенти Ислом Каримов "Халқаро коалициянинг Афғонистондан олиб чиқилиши минтақадаги вазиятни янада оғирлаштиргани" ҳақида айтиб ўтганди.