Наманган вилоятида абитуриентларни ноқонуний ўқишга киритиш мақсадида ташкил этилган “бункер” фош этилди. Бу ҳақда “Ҳуқуқ” нашри ёзмоқда.
Айтилишича, Поп туманида истиқомат қилувчи Отабек Валиев ўтган йилнинг июнь-июль ойларида Наманган муҳандислик педагогика институти ўқитувчиси Азиз Ходжаев, Молия вазирлиги ҳузуридаги БТПЖ Мингбулоқ туман бўлими бошлиғи Р. Ҳасанов, Наманган муҳандислик технология институти ўқитувчиси Н. Топилдиев, АТБ “Микрокредитбанк” Поп филиали етакчи мутахассиси Ж. Раймалиев, Поп тиббиёт коллежи омборчиси З. Комилов, НамМТИ ўқитувчиси О. Юлдашев, Чуст академик лицейи ўқитувчиси М. Умаров, жами 32 кишидан иборат уюшган гуруҳ – “бункер” тузган. Уларнинг фаолияти учун Тўрақўрғон тумани ва Наманган шаҳрида махсус жойлар ташкил этилган. Бу хоналар компьютер ва бошқа жиҳозлар билан таъминланган. Гуруҳнинг мақсади имтиҳон куни турли ноқонуний йўллар билан талабаларни ўқишга киритиш бўлган.
Шу мақсадда Отабек Валиев ўзига мурожаат қилган 57 абитуриентлардан пул олиб, уларни ўқишга киритишга ваъда қилган. Тўпланган жами пул 18.5 минг долларни ташкил қилган.
2014 йилнинг 1 август куни О. Валиев етакчилигидаги жиноий гуруҳ абитуриентлардан юбориладиган тест саволларини кутиб турган вақтда МХХ ва ИИБ тезкор ходимлари томонидан қўлга олинган.
Бу катта иш вилоятда қизғин муҳокама қилинди. 30дан ортиқ одам аралашган бу иш бўйича суд ўз хулосасини берди. Гуруҳ иштирокчиларига қандай жазолар тайинлангани материалда аниқлаштирилмаган.