Техасда истиқомат қилувчи Марк Оберхолцер унинг Ford F-250 пикапини автомобилдан унинг сув қувурлари компанияси рекламасини ечмаган ҳолда сотиб юборгани учун дилерларни судга берди. Бу ҳақда CNN телеканали хабар бермоқда.
2013 йили Оберхолцер пикапни ишлатилган автомашиналар дилерига сотган эди. Сотиш олдидан у реклама материалини узиб ташлай бошлади, аммо автодилернинг ходими машина рангига зиён етказмаслик учун бу ишни қилмасликни сўраганди. Сотилиш олдидан реклама олиб ташланиши ҳам ваъда қилинган эди.
Шундан сўнг автомобиль Туркияга сотиб юборилган. Икки йилдан сўнг чоп этилган фотосуратларда ИШИД террорчилари Оберхолцернинг компанияси реклама қилинаётган машинада туриб ўт очаётгани акс этди.
Техаслик ишбилармонга АҚШнинг турли бурчакларидан минглаб қўнғироқлар бўлди. “Бу қўнғироқларнинг аксарияти ҳақорат руҳида бўлиб, улар орасида таҳдидлар ҳам бор эди”, - тан олади Оберхолцер суд даъвосида.
У дилердан кўрган зарарларини қоплаш учун 1 млн доллар тўлашни талаб қилмоқда.