Нью-Йорк штати парламенти миллиардер Дональд Трамп исми билан аталадиган боғ номини ўзгартирмоқчи. Бундай чора унинг сайловолди пойгасида кўплаб чиқишларидан бирида ксенофоб руҳдаги баёнотларга йўл қўйиб, мусулмонларни мамлакатга киритмасликни таклиф қилиши билан боғлиқ.
Сенатор Дэниел Скуадрон ва Нью-Йорк қонунчилик ассамблеяси аъзоси Чарльз Лавинлар берган маълумотга қараганда, Трамп “унинг номи билан боғ аталишига муносиб эмас”. Улар қонун лойиҳасини тез орада тайёрлаб, штат парламенти муҳокамасига киритмоқчи.
Дональд Трамп номидаги боғ ҳудуди 1.76 кв км ҳудудни эгаллаб, у Уэстчестер округида жойлашган. Миллиардер 90-йилларда уни 2 млн долларга харид қилган, аммо штат маъмуриятидан у ерда гольф майдони яратишга рухсат ололмаган. 2006 йили у боғни Нью-Йоркка совға қилган, бунда унинг нархини 100 млн долларга баҳолаган.
Бу тортиқ унга солиқларни енгиллаштириш борасида улкан имтиёзлар берилишига омил бўлган. 2010 йили боғ маблағ етишмовчилиги туфайли ёпиб қўйилган.
Эслатиб ўтамиз, хурмача қилиқлари билан машҳур бўлган Дональд Трамп охирги баёнотларидан бирида, агарда президентлик мансабига чиқса, мусулмонларнинг мамлакат ҳудудига киришини тақиқлашини маълум қилди. Унинг бу сўзлари кўпчилик ижтимоий аҳамиятга молик шахслар ва ташкилотлар томонидан кескин танқид остига олинди.