АҚШ президенти Барак Обама Оқ уйда ўтказилган катта матбуот анжуманида йил якунларини ўқиб эшиттирди, шунингдек, журналистларни қизиқтирган саволларга жавоб берди.
Журналистлар билан беш соат мулоқот қилган россиялик ҳамкасби Путиндан фарқли ўлароқ, бунинг учун Обамага бир соатдан камроқ вақт талаб қилинди.
Обама қисқа гапиришини олдиндан айтди, негаки “Юлдузлар жанги”нинг навбатдаги қисмини кўришга шошилаётган экан.
Бундан ташқари, анжуман Обаманинг Гавайига Янги йил таътилига учиб кетиши олдидан кун тартибида белгиланган охирги тадбир эди.
Биринчи навбатда, Обама Парижда “АҚШ етакчилигида” 200 давлат маъқуллаган иқлим ўзгариши бўйича декларациянинг имзоланишини йилнинг асосий ютуқларидан бири, деб баҳолади. Шунингдек, у ИШИДга қарши олиб борилаётган кураш ҳамда Сан-Бернардинодаги отишма тафсилотларига тўхталиб ўтди.
Ички сиёсатдаги асосий ютуқлардан бири сифатида президент барча 50 штатда бир жинсли никоҳларнинг тан олинишини эътироф этди.
“2016 йилда мен барча кучимни янги ютуқларга сарфлайман”, - деган сўзлар билан Оқ уй раҳбари ҳисоботини якунлади.