Хитой миллий нефть-газ компанияси (CNPC) Ўзбекистондаги Қўнғирот блокида иш олиб боришга рухсат олмоқчи. Бу ҳақда Sputnik агентлиги Ўзбекистон ҳукумати ёқилғи-энергетика комплекси департаменти вакилига таянган ҳолда маълумот бермоқда.
Айтилишича, кон илгари Россиянинг Лукойл компаниясига тегишли бўлган.
“Биз CNPC’га бу блокни таклиф этдик, ҳозир музокаралар кетмоқда, 2016 йил бошида Хитой инвестор жавоб беради”, - деди агентликнинг суҳбатдоши.
Унинг сўзларига қараганда, кўрсатилган ҳудудда қазиб чиқарилаётган табиий газ ресурслари 100 млрд кубометрдан ошади.
Ноябрь ойида Лукойл Ўзбекистоннинг ваколатли органларига Қўнғирот блокида геология разведкаси ишларини ўтказиш лицензиясини у ерда аниқланган углеводородлар ҳажмининг норентабеллиги туфайли қайтарганлиги маълум қилинган эди. 2009 йили компания бу ерда Шеге конини очиб, 2010 йили уни ишга туширишни режалаштирган эди.