Француз кучлари Мали пойтахтида Radisson Blu меҳмонхонасига уюштирилган ҳужум учун жавобгарликни ўз зиммасига олган “Ал-Мурабитун” террорчилик гуруҳининг 10 га яқин жангарисини бартараф қилди.
Франция Мудофаа вазирлиги твиттерда махсус кучлар билан жангарилар ўртасидаги жанг Менака шаҳрида 19 декабрдан 20 декабрга ўтар кечаси бўлиб ўтганини маълум қилди.
Жанг 4 соатга яқин давом этган, иккита пикап машинаси ва ўнта мотоцикл ҳамда катта сондаги қурол-аслаҳа ва портловчи моддалар қўлга киритилган. Бартараф қилинган террорчилар ўлдирилгани ёки тирик қўлга олингани ҳақида маълумот берилмаган.
Аввалроқ “Ал-Қоида” террорчилик гуруҳи Малидаги меҳмонхонага бир нечта радикал гуруҳ ҳужум қилганини маълум қилганди.
Меҳмонхонага ҳужум 20 ноябрда содир этилган. 170 киши асирга тушиб қолган, жумладан 6 нафар россиялик жангарилар қурбонига айланган.
Декабрь ўртасидан Мали Саудия Арабистони бошчилигидаги ислом аксилтеррорчилик коалициясига кирган давлатлардан бири бўлди.