Микрочиплар ишлаб чиқарувчи Intel компанияси “буюмлар интернети” (Internet of Things, IoT) бозорининг энг нуфузли иштирокчиси деб тан олинди. IoT Analytics мутахассислари ушбу технологиялар билан боғлиқ брендларнинг веб-сайтлар ва ижтимоий тармоқларда тилга олиниши миқдорини ҳисоблаб чиқиб, шундай хулосага келишди. Тадқиқот 2015 йилнинг иккинчи ярми кўрсаткичларига асосланади.
IoT Analytics маълумотларига қараганда, соҳанинг энг кўзга кўринган компаниялари АҚШда жойлашгандир: Intel’дан кейинги ўринларни IBM, Microsoft, Google ва Cisco эгаллаган. 9 ва 10-ўринларда Samsung ва LG корпорациялари жойлашди, деб хабар беради Жанубий Кореянинг Yonhap агентлиги.
Япониянинг NEC компанияси рўйхатнинг 16-поғонасини банд қилди. Хитойнинг Huawei компаниясига 18-ўрин насиб қилди.
Маълумот учун, “буюмлар интернети” барча моддий объектларнинг тармоққа уланиб, бир-бирини идентификация қилишини, шу йўл билан ҳар қандай ишни қулайлаштиришни кўзда тутадиган концепциядир.