Исроил мудофаа вазирлиги мамлакатнинг ракетага қарши мудофаа дастурига бошчилик қилган Яир Раматининг истеъфога чиқарилганини маълум қилди.
Мудофаа вазирлигининг расмий баёнотида Рамати “ахборот махфийлиги қоидаларини қўпол бузгани учун” ишдан бўшатилгани айтилган. Мудофаа вазирлиги Раматига қилган хизмати учун миннатдорчилик билдириб, бошқа изоҳлар беришдан бош тортди.
Haaretz нашри маълумотларига кўра, Раматининг айби шунда бўлганки, у махфий ахборотни ўзининг шахсий компьютерида сақлаган. Бу маълумотлар қаергадир чиқиб кетганининг исботи бўлмасада, мудофаа вазирлигида ишнинг нозиклигини ҳисобга олган ҳолда бундай хатти-ҳаракатга йўл қўйиб бўлинмаслиги ҳақидаги хулосага келинди.
Рамати 4 йил давомида “Темир гумбаз” ва “Камон” каби дастурларга жавоб берган. Бу дастурлардан мақсад мамлакатни ташқаридан ракета ҳужумидан, жумладан Ғазо секторидан туриб фаластин экстремистлари томонидан Исроил шаҳарларининг ракеталар билан ўққа тутилишидан ҳимоя қилишдан иборат бўлган.
Бундай воқеа Исроил мудофаа вазирлигида биринчи марта содир бўлаётгани йўқ. Бир неча йил аввал Исроил мудофаа вазирлиги Исроилнинг шимолидаги артиллерия қўшинларига қўмондонлик қилган Илан Левини номаълум шахслар томонидан олиб қочиб кетилган машинасида махфий ҳужжатларни қолдириб кетгани учун бўшатиб юборган. Машина кейинроқ ҳужжатлар билан топилган, бироқ бу Левининг ўз лавозимини сақлаб қолишига ёрдам бермаган.