"Манчестер Юнайтед" бош мураббийи Луи ван Гаал АПЛнинг 19-турида "Челси"га қарши кечган учрашувдан (0:0) кейин берган интервьюсида ўз лавозимини тарк этиш ҳақида ўйламаётганини билдириб ўтди.
"Менинг истеъфо бериш эҳтимолим ҳақида сўраяпсизми? Мен учун келажагим ҳақидаги суҳбат умуман қизиқарли мавзу эмас. Ахир, мен келажакка таъсир қила олмайман. Мен фақат ўз футболчиларим билан ишлашим мумкин, ўзингиз кўрдингизку, улар мен учун жангавор ўйин ўтказишди.
Ҳатто шундай натижадан сўнг ҳам мухлислар мени олқишлашди. Шу сабабли ташвишдаман, деб айта олмайман. Футболчиларимга тўла ишонаман.
Ўз ихтиёрим билан истеъфога чиқаманми? Аксинча... Футболчилар бу қадар оғир босим остида ҳам шунчалик яхши ўйин кўрсатар экан, истеъфога чиқишим учун ҳеч қандай сабаб йўқ. Балки ОАВ шуни истаётгандир, аммо мен кетмайман. Бу орқали ўз ўрнимга ёпишиб олаётганим йўқ, буни шартнома шартларини бажариш деб ҳисоблаш керак", деган голландиялик мураббий Mirror нашрига.