БААнинг Дубай шаҳридаги осмонўпар бинолардан бири, Address Downtown номли меҳмонхона биносида Янги йил байрамига бир неча соат вақт қолганида йирик ёнғин бошланди. Бу ҳақда Al Jazeera телеканалида маълум қилинди.
Бу ёнғин дунёдаги энг баланд бино бўлмиш «Бурж Халифа» рўпарасидаги бинонинг 20-қаватида юз берган. Ёнғин тез орада юқори қаватларга тарқалган. Address Downtown меҳмонхонасининг умумий баландлиги 63 қават.
Юзлаб кишилар зудлик билан эвакуация қилинган. Охирги маълумотларда ёнғин туфайли 14 киши енгил жароҳатлар олгани айтилган.
Полиция ҳудуд атрофини ўраб олган. Ўт ўчирувчилар ва вертолётлар ёрдамида ёнғин ўчоғи бартараф этилган. Бинонинг қолган қисмларидаги кичик ёнғинларни ўчириш ишлари давом этмоқда.
Ёнғин сабаблари ҳозирча аниқланмаган.
