Ироқнинг ИШИДдан озод қилинган ҳудудларига 500 мингдан кўпроқ ироқлик қайтиб келган. Бу ҳақда БМТнинг Ироқдаги махсус элчиси Ян Кубиш маълум қилди. Унинг айтишича, 2016 йилда яна 900 минг ироқлик қайтиши кутилмоқда.
Кубишнинг таъкидлашича, озод қилинган ҳудудлардаги вазиятнинг барқарорлашиши ва ички қочқинларнинг бу ҳудудларга хавфсиз қайтиши Ироқ инқирозини тартибга солиш истиқболи учун катта аҳамиятга эга. Шу сабабли Кубиш Тикрит шаҳрини тиклаш бўйича муваффақиятларга эътиборни қаратди. Унинг айтишича, бу шаҳарга аҳолининг 90 фоизи, яъни 167 минг киши қайтиб келган.
Кубишнинг маълум қилишича, Ироқ хавфсизлик кучлари бошқа давлатлар кўмагида ИШИД жангариларидан ҳудудларни ишончли тарзда қайтариб олмоқда. Унинг айтишича, бир қатор муҳим ҳудудлар устидан назоратнинг қайтарилиши "ироқликларга уларнинг давлати ИШИДдан озод қилиниши мумкинлигига ишонч берди".
Кубиш одамларнинг уйларига қайтишларига халақит бераётган омиллар орасида ИШИД томонидан қўйиб кетилган "катта миқдордаги қўлбола портловчи моддалар"ни айтиб ўтди. Кубиш, шунингдек, террорчилардан озод қилинган ҳудудлардаги вазиятни барқарорлаштириш, шу жумладан полиция ишини тиклаш учун зарур маблағларнинг етишмаётганлигини таъкидлаб ўтди.
Кубиш Ироқдаги гуманитар инқирозга тўхталиб, 2016 йилда вазият янада мураккаблашиши мумкинлигидан огоҳлантирди. "Бугунги кунда нафақат 3,3 млн кўчиб ўтган одам, балки 10 млн ироқлик, яъни мамлакатнинг учдан бир аҳолиси турли кўринишдаги гуманитар ёрдамга шошилинч эҳтиёж сезмоқда", деб айтди Кубиш. У қолган давлатларни январь охирида гуманитар ташкилотлар Ироқда 2016 йилда гуманитар операцияларни молиялаштириш учун сўраган 861 млн долларни ажратишга чақирди.