Беларусь президенти Александр Лукашенко Россия президенти Владимир Путин билан Минскдаги кенгайтирилган тартибдаги учрашувда Путинни Дмитрий Анатольевич деб янглиш атаб юборди.
Маълум қилинишича, бу қизиқ воқеа Беларусь президенти учрашувни очаётганда юз берди. "Ҳурматли Дмитрий Анатольевич", деб ўз сўзларини бошлади Лукашенко Путинга мурожаат қилиб. Ушбу ҳолат чоп этилган видеода Лукашенко бу сўзларни айтгандан кейин бироз талмовсираб нега бундай бўлганини тушунтириб беришга уринган.
Бироқ Путин Лукашенконинг гапини бўлиб, юз берган воқеага ҳазил билан жавоб берди. "Мен тушунтириб бераман. Ахир пуллар ҳаммаси у ердада", деб айтди Путин бюджет молиялаштириши тақсимлаши билан Россия ҳукумати шуғулланишини назарда тутиб ҳамда Дмитрий Медведев ва Россия ҳукумати аъзолари ўтирган томонга ишора қилиб қўйди.
Лукашенко шундан кейин нутқини давом эттирди. "Ҳурматли Владимир Владимирович, ҳурматли Дмитрий Анатольевич, ҳурматли дўстлар", деб ўз нутқини бошқатдан бошлади Лукашенко.
Лукашенко ва Путиннинг кенгайтирилган тартибдаги учрашуви Иттифоқдош давлатлар олий кенгаши йиғилиши олдидан бўлиб ўтди. Ундан аввал икки давлат етакчиси бирга-бир учрашган.