Carscoops нашри Aston Martin британ маркасининг янги суперкари Aston Martin DB11 моделининг расмий суратларини чоп этди. Бу янги машина Женева автосалонида намойиш қилинади. Купе Aston Martin’нинг турбонаддувли двигатель билан жиҳозланган биринчи модели бўлади.
Суратларга кўра, янги машина жосус Жеймс Бонд ҳақидаги янги фильм – "Спектр" учун махсус ясалган DB10 суперкари услубида бажарилган.
Ҳозирча машинанинг интерьери суратлари олинмаган. Модель 5,2 литрли 12 цилиндрли, 600 от кучига эга твин-турбо двигатели билан жиҳозланади. Шунингдек, моторлар қаторига Mercedes-Benz’нинг 4 литрли 8 цилиндрли битурбо двигатели ҳам кириши мумкин.
Икки эшикли модель "Мерседес"нинг электроникаси ва интерьер элементларини олади. Компаниялар 2013 йилда ҳамкорлик ҳақида келишув имзолашган.
Женева автосалони 3-13 март кунлари бўлиб ўтади. Aston Martin DB11 купеси автосалоннинг матбуот куни – 1 мартда намойиш қилиниши керак.
