Баҳорнинг биринчи куни Тошкентдаги Next ва Vega савдо-кўнгилочар мажмуаларида жойлашган Trend супермаркетлари ўз ишини тўхтатди. Уларнинг ўрнига яқин орада korzinka.uz филиаллари иш бошлайди.
Супермаркетлар ёпилиши олдидан катта ассортиментдаги маҳсулотларга чегирмалар эълон қилинди. Бу ҳолатни Trend вакиллари Facebook ижтимоий тармоғида "савдо тармоғидаги бўлажак ўзгаришлар" ва "қайта юкланиш бошланиши" билан изоҳлашган.
"1 мартдан бизнинг супермаркетлар бир неча кундан кейин ўз ишини янги форматда бошлаш учун ёпилади! Сиз шунчалик ажабланасизки, ҳаттоки бунга тайёрланишга ҳам уринманг", деб ёзилганди супермаркет тармоғининг ижтимоий тармоқ саҳифасида февралда чоп этилган постида.
"Газета.uz" нашрига маълум бўлишича, ёпилган икки супермаркет ҳам korzinka.uz тармоғининг бир қисмига айланади. Next мажмуасида "Корзинка" филиали 15 мартда очилиши кутилмоқда.
Биринчи Trend супермаркети Next мажмуасида 2013 йил декабрда, иккинчиси эса Vega мажмуасида бир йилдан кейин очилган эди.
korzinka.uz Ўзбекистондаги энг йирик супермаркетлар тармоғи ҳисобланиб, Тошкентда 15 тадан кўп ва Олмалиқда битта филиалга эга.