Россиялик хакерлар Германия энергетика тизимига ҳужум қилишмоқчи, деб таъкидламоқда Tagesspiegel немис нашри. Германия конституциясини қўриқлаш федерал бошқармаси мактубида айни вақтда ҳужумга тайёргарлик кетаётгани айтилган. Февралда АҚШлик изқуварлар россиялик хакерларнинг Украина энергетика тизимига ҳужумларга алоқалари борлигини тасдиқлашганди. Бу ҳужум бу турдаги биринчи ҳужум бўлган.
Tagesspiegel’нинг махсус хизматлар мактубларига иқтибос келтирган ҳолда таъкидлашича, ҳужумни Sofacy (шунингдек, АРТ28 номи билан ҳам маълум) хакерлик гуруҳи тайёрламоқда. Мактуб турли иқтисодий уюшмаларга жўнатилган, унда экспертлар энг ёмон вазиятда бутун электр станциялар ва тармоқлар ишдан чиқиши мумкинлигидан огоҳлантирмоқдалар.
Маълум қилинишича, зарарли дастурлар компьютерларга 32 та интернет-манзилдан юборилиши мумкин. Таъкидланишича, Sofacy ортида гўёки Россия Федерал хавфсизлик хизмати ва Бош разведка бошқармаси туради.
Айнан шу хакерлик гуруҳи 2015 йил баҳорида Германия парламентига йирик ҳужумни амалга оширган.
Бундестаг депутати Бурхард Лишканинг айтишича, Россия ҳукумати немис жамиятида хавфсизлик борасида ишончсизлик ҳиссини кучайтирмоқчи. Унинг айтишича, ҳаттоки битта электр станциянинг ишдан чиқарилиши мамлакатда "барқарорсизлик вазиятини" келтириб чиқариши мумкин.