Дортмунднинг "Боруссия" жамоаси мухлиси Германия чемпионатининг 26-турида "Майнц"га қарши ўтказилган учрашув вақтида оламдан ўтди. Бу ҳақда жамоанинг расмий сайтида хабар берилган.
Маълум қилинишича, 80 ёшли мухлиснинг ўлимига юрак хуружи сабаб бўлган. Ўйин вақтида яна бир мухлис шифохонага олиб кетилган.
Мухлиснинг ўлими 70-дақиқада рўй берган. Шу заҳоти таблода бу ҳақда эълон қилинган. Ўйинда урилган иккинчи гол нишонланмаган. 81 минг кишилик стадион қолган 20 дақиқа давомида жимликка чўмган. Бош ҳакам ўйинга қўшимча вақт қўшиб бермаган.
Ўйин якунида стадиондаги мухлислар марҳум мухлис хотираси учун «You'll Never Walk Alone» қўшиғини жўр бўлиб куйлашган. Футболчилар ҳам улар қаршисида тизилиб, марҳумни хотирлашган.