Москва жанубида Ўрта Осиё республикаларидан борган 50 нафар атрофидаги меҳнат муҳожирлари иштирокида оммавий муштлашув бўлиб ўтди. Бу ҳақда Россия ИИВга асосланган ҳолда Интерфакс хабар берган.
Маълум қилинишича, шаҳарнинг Кавказ хиёбонидаги 58 уй олдида 14 март куни икки гуруҳ ўртасида тушунмовчилик натижасида жанжал чиққан.
"Аниқланишича, бу одамлар маиший масала туфайли жанжаллашишган", дейди ҳуқуқ-тартибот органлари ходимларидан бири. Унинг айтишича, жанжал иштирокчиларидан 2 нафарига мия чайқалиши ташхиси қўйилган.
Полиция воқеа жойида 28 кишини қўлга олган. Улар полиция маҳкамасига олиб кетилган.
15 февраль куни ҳам Москва яқинида Россиянинг турли ҳудудларидан келган ишчилар ва Ўзбекистон ҳамда Тожикистон фуқаролари бўлган бошқа ишчилар гуруҳи ўртасида оммавий муштлашув бўлиб ўтган, бир-бирига пичоқлар ва болғалар билан ҳужум қилган бу кишилардан 28 нафари ҳибсга олинганди.