АҚШ Қуролли кучларининг Афғонистондаги бўлимининг собиқ қўмондони генерал Жон Кэмпбелл ҳудуддаги "Толибон" жангариларга ҳаво зарбалари беришда давом этишни таклиф қилди. Бу ҳақда The Washington Post хабар берган.
Нашрнинг ёзишича, Кэмпбелл Афғонистон ҳукуматининг жангариларига қарши курашини АҚШ самолётлари қўллаб-қувватлаши зарурлигини айтган. Унинг фикрича, "Толибон"нинг ўз таъсирини кенгайтириши америкаликларнинг босқичма-босқич мамлакатни тарк этиши жараёнига зарарли таъсир кўрсатиши мумкин. Бундан ташқари, у америкалик ҳарбий маслаҳатчиларни Афғонистонга келтириш ва афғон ҳарбийларининг марраларини фронт чизиғи томон яқинроқ суриш таклифини билдирган. У шунингдек, жангариларнинг ҳарбий бошлиқларини йўқ қилишни мақсад қилган ҳаво ҳужумлари уюштириш кераклигини таъкидлаган.
Қайд этилишича, генерал ўз таклифларини тўғридан-тўғри Оқ уйга йўллаган. Яъни, унинг мурожаати АҚШ Мудофаа вазирлиги раҳбари Эштон Картерни айланиб ўтган ҳолда президент маъмуриятига келиб тушган. Бу эса Пентагондагиларнинг норозилигини келтириб чиқарган. Кэмпбелл ўз ҳаракати юқори даражали мансабдорлар "юзига оёқ қўйиш" экани ҳақидаги иддаоларни тан олмаган.
Пентагон вакилининг баёнотига кўра, АҚШ Афғонистонни қўллаб-қувватлаш борасидаги ҳаракатларни кенгайтириши мумкин. АҚШнинг зиддиятга аралашуви афғонистонлик ҳарбийларнинг кучсизлиги туфайли заруратга айлангани қайд этилган.
Бундан олдинроқ, Афғонистон ҳукумати ва "Толибон" вакиллари ўртасидаги музокаралар ўтказилиши номаълум муддатга қолдирилгани ҳақида хабар берилганди.