Chevrolet компанияси треклар учун мўлжалланган Camaro ZL1 спорткарининг усти очиқ модификациясини намойиш қилди. Модель Нью-Йоркдаги моторшоуда илк бор намойиш қилинди.
Кабриолет 640 от кучига эга, 8 цилиндрли, 6,6 литрли бензин двигатель олди. Двигатель 10 поғонали автоматик узатмалар қутиси билан жуфтликда ишлайди. Кабриолет компаниянинг Camaro ZL1 купесидан кейин бундай узатмалар қутиси билан жиҳозланаётган иккинчи модели бўлди.
Компания вакилларининг айтишича, трекларга мўлжалланган кабриолет купе вариантига ўхшаш кўрсаткичларга эга, бироқ унинг аниқ кўрсаткичлари келтирилмади.
Спорткар магнитореологик созланувчи амортизаторлар, орқа дифференциалнинг электрон бошқарувли блокировкаси, олти поршенли Brembo тормоз механизмлари, 20 дюймли диск ғилдираклари ва Camaro учун махсус яратилган Goodyear Eagle F1 Supercar шиналарига эга адаптив подвеска (кузов остидаги деталлар тўплами) билан жиҳозланган.
Нью-Йоркда шунингдек Camaro ZL1 купеси ҳам намойиш қилинди. У йил охирида сотувга чиқарилади. Купенинг кабриолет варианти эса 2017 йилдагина сотувда пайдо бўлади.
