Сиднейда яшовчи Андреас Стивенс Tesla компаниясининг янги модели – Model 3 электромобилини харид қилиш мақсадида савдолар бошланишидан икки кун аввал у учун навбатга турди. Бу модель ушбу марканинг моделлар қаторидаги энг арзон модель бўлади. Эркак бу машинани интернет орқали ҳам сотиб олиши мумкин эди, бироқ у машинани шахсан ўзи дилерлик пунктида харид қилмоқчи бўлди, деб хабар бермоқда Mashable портали.
Стивенс "Тесла" салонига 29 мартда эрталабдан келди. Машинанинг офлайн-савдолари 31 мартда бошланади, унга 1 апрелдан интернет орқали буюртма бериш мумкин бўлади. Стивенснинг айтишича, у Model 3’нинг илк харидорларидан бўлишни истагани учун навбатга турган. У навбатга ўзи билан йиғилувчи стул, рюкзак ва Илон Маск ҳақидаги "Elon Musk: Tesla, SpaceX, and the Quest for a Fantastic Future" (Илон Маск: Tesla, SpaceX ва фантастик келажакка саёҳат) деб номланган китобни олган.
Эркакнинг айтишича, у автомобиллар ихлосманди бўлмай, 22 йиллик Toyota Corolla’да юради. У Tesla маркаси билан унинг ўғли компаниянинг раҳбари Илон Маск ҳақида тинмай гапиравергандан кейин қизиқиб қолган. Бундан ташқари, Стивенс электромобилни бошқариш қандай бўлишини билишни орзу қилган.
Стивенснинг айтишича, автосалон ходимлари унга ғамхўрлик кўрсатишган ҳамда Tesla Model S моделида юриб кўришга ижозат ҳам беришган.
Стивенсни Model 3 нархи ҳали расман эълон қилинмагани ҳам ўз истагидан қайтармаган: машина нархи премьера куни ошкор қилинади. Машина АҚШда 30 мингга яқин туриши тахмин қилинмоқда. Стивенс, Австралияда машина учун 78 минг дан 91 минггача австралия доллари (60 минг дан 70 минггача АҚШ доллари) тўлашга тўғри келишини тахмин қилмоқда.
Model 3 ташқи кўриниши ҳам сир тутилмоқда. Март ўртасида Tesla янги моделнинг "шарпаси" акс этган тизерни намойиш қилганди.