Қозоғистон ички ишлар вазири ўринбосари Ерлан Турғумбоевнинг маълум қилишича, эндиликда, мамлакат фуқаролари автомактабларда таҳсил олмасданоқ ҳайдовчилик гувоҳномаларини олиши мумкин.
Унинг сўзларига кўра, Қозоғистонда мотоцикл ва енгил автомобилларни бошқариш учун рухсат олишни хоҳлаган кишиларнинг мустақил тайёрланиш тизими жорий этилмоқда. Даъвогар фуқаролар эса, аҳолига хизмат кўрсатиш марказларида имтиҳон топширишлари мумкин бўлади. Ерлан Турғумбоевнинг айтишича, янгилик апрель ойидан бошлаб жорий этилиши мумкин.
Бундан ташқари, мамлакат ички ишлар вазирлиги, ҳайдовчилик гувоҳномаси муддати тугагач, фуқароларнинг қайтадан назарий имтиҳон топшириш мажбуриятини ҳам бекор этиш масаласини кўриб чиқмоқда.