Исроиллик олимлар кашф этаётган молекула сичқонларда Альцгеймер хасталиги белгиларининг бутунлай йўқолишига олиб келди.
Haaretz газетаси ёзишига қараганда, ушбу дори воситаси одамларда ҳам самара бериши ҳақида гапиришга эрта, бироқ олимлар шу пайтга қадар эришилган тажриба натижалари ҳозирда тузалмас ҳисобланган касалликни даволаш усули топилганлигига умид қилиш мумкин, деб фикр билдиришди.
Касалликка қарши янги дори воситаси устида Бар-Илан Университети профессор-кимёгари Билҳа Фишер ва Тель-Авив Университетининг Тиббиёт мактаби профессор-неврологи Даниэль Оффен иш олиб бормоқда.
Маълумот ўрнида: Альцгеймер хасталиги – асосан 65 ёшдан ўтган одамларда учрайдиган нейродегенератив касаллик. Хасталикка илк бор 1907 йили немис психиатри Алоис Альцгеймер томонидан тавсиф берилган. 2006 йили дунё бўйича ушбу касалликка чалинган 26,6 миллион одам қайд этилган.
Одатда касаллик унча сезилмайдиган белгилардан бошланади ва бу белгилар авж олиб боради. Масалан, яқинда бўлиб ўтган воқеани эслолмаслик. Борган сари хотира ёмонлашиб, нутқ ва когнитив функциялар бузилади ва бемор ўзига ғамхўрлик қилолмайди.