Виртуал реаллик технологияси ўзида сақлаётган салоҳият йирик бизнесни ўзига жалб қилишни бошлади. VR-тизимларга уй учун мебель ва товарлар сотувчи тармоқ IKEA қизиқиш билдира бошлади. Компания жорий ҳафтада эндигина харидорларга етказила бошлаган HTC Vive виртуал реаллик кўзойнакларига мини-ўйин чиқарди.
IKEA VR Experience – экспериментал дастур бўлиб, Epic Games студиясининг Unreal Engine 4 движоги негизида яратилган. Бунинг эвазига фойдаланувчилар виртуал фазо бўйича сайр қилиб, IKEA маҳсулотлари билан танишишлари мумкин бўлади.
Ҳозирча бундай сайрни амалга ошириш учун биттагина виртуал хона бўлиб, у ҳақиқийсидан деярли фарқ қилмайдиган 3D-ошхонадан иборат. HTC’нинг VR-кўзойнакларини тақиб, фойдаланувчилар хона бўйлаб эркин юра олишлари, мебель жиҳозларининг ранги ва қопламасини ўзгартиришлари ҳамда интерьерни ёш бола ёки катта ёшли одамнинг бўйи баландлигидан кўришлари мумкин бўлади.
Бундан ташқари, VR Experience турли жойларга "телепортлаш" (кўчиш) ва баъзи анжомлар билан турли ҳаракатларни амалга ошириш имконини беради. Мисол учун, товани қўлга олиб, уни плита устига қўйиш ёки мева пўчоғини чиқинди челагига ташлаш мумкин бўлади.
Компанияда таъкидланишича, VR Experience – пилот лойиҳа бўлиб, 2016 йил августигача амалда бўлади. Агар бу лойиҳа муваффақиятли чиқса, IKEA эҳтимол бошқа 3D-хоналарни ҳам яратиши мумкин бўлади. Дастурни Steam ўйин каталогидан бепул юклаб олиш мумкин.