Қирғизистон парламенти 7 апрелни байрам сифатида нишонлаш ва бу кунда дам олиш ҳақида қарор қабул қилди. Бу ҳақда ТАСС нашри Қирғизистон қонунчилик органи матбуот хизматига асосланиб хабар тарқатган.
"Ушбу қонун лойиҳаси депутатлар томонидан учинчи ўқишда қабул қилинди", дейилади хабарда.
7 апрель кунини байрам ва дам олиш куни сифатида эълон қилиш ташаббуси мамлакат президенти Алмазбек Атамбаев томонидан 2 кун олдин берилганди. Унинг фикрича, "республика барқарор ривожланиш ва коррупцияга қарши самарали кураш йўлига чиқди". Шунингдек, у 2010 йилнинг 7 апрелидаги инқилобдан кейин "Қирғизистон қашшоқ мамлакатлар қаторидан чиқиб эркин демократик танловлар амалга ошириладиган" мамлакатга айланганини таъкидлаган.
"Апрель инқилоби ниҳоят қирғиз халқининг қариндош-уруғчилик тизими устидан ғалаба қилганини кўрсатади. Афсуски, бу ғалаба бизга қимматга тушган. Юзга яқин фуқаро бу йўлда ҳалок бўлишган, минглаб қирғизистонликлар тўқнашувлар вақтида жароҳатланган", дея эслайди давлат раҳбари.
2010 йилнинг 7 апрелида Бишкек шаҳрининг шарқий қисмида минглаб киши ўшандаги президент Қурбанбек Бакиевнинг истеъфосини талаб қилиб, митингга тўпланганди. Намойиш вақтида намойишчилар ва ҳуқуқ-тартибот органлари вакиллари, хусусан, "Альфа" бўлинмаси жангчилари ўртасида тўқнашув келиб чиқади. Тўқнашув давомида қуролга эга бўлган намойишчилар ҳукумат биноси олдидаги майдонга йўл олади.
Бинони қўриқлаб турган ҳарбий хизматчилар эса намойишчиларга қарата ўт очиши натижасида 87 киши ҳалок бўлиб, юзлаб киши жароҳатланади. Шу билан бир вақтда, Бакиевнинг тарафдорлари унинг қочиб кетишига йўл очиб беришади. У аввалига ўз қишлоғига, кейинроқ хорижга йўл олади. Айни вақтда у Беларусь ҳудудида яшамоқда.