Швеция футбол федерацияси миллий терма жамоанинг кейинги бош мураббийи номини эълон қилди. Қироллик термасига шу вақтгача "Норрчепинг" жамоасида ишлаб келган Янне Андерссон бош мураббий бўлади. Бу ҳақда 7 апрель куни "Френдз арена" ҳудудида ўтказилган махсус матбуот анжуманида маълум қилинган.
Андерссон янги ишига 2016 йилги Европа чемпионатидан кейин киришади. Унинг бошқарувидаги "Норрчепинг" жамоаси 2015 йилги мавсум чемпиони бўлди.
Ҳозирда миллий терма жамоани бошқараётган Эрик Хамрен 2009 йилдан буён шу вазифада ишлаб келмоқда ва у шу йилнинг февралида лавозимини тарк этмоқчилиги ҳақида эълон қилганди. Унинг бошчилигида терма жамоа 2014 йилги жаҳон чемпионатига чиқа олмади. Ҳал қилувчи плей-офф ўйинида шведлар португаллардан 2 ўйин натижасига кўра енгилишди.
Швеция термаси Франция майдонларида ўтказиладиган Европа чемпионатига чиқиш учун саралаш босқичида гуруҳда учинчи ўринни эгаллагач, ўтиш ўйинида Дания қаршилигини енгишига тўғри келди. Швеция турнирда Ирландия, Италия ва Бельгия термалари билан бир гуруҳдан ўрин олган.