15 апрелда кечки пайт 1998-2008 йиллар давомида Арманистон президенти лавозимини эгаллаган Роберт Кочаряннинг Еревендаги уйига ҳужум уюштирилди.
"Собиқ президентнинг уйига ҳужум уюштирилгани ҳақида хабар тушди, воқеа жойида тезкор гуруҳ ишламоқда", деб маълум қилинди Арманистон полицияси матбуот хизматида, бироқ бошқа тафсилотлар келтирилмади.
Бу орада Кочарян офиси бошлиғи Виктор Согомоняннинг айтишича, Кочаряннинг ўзи бу вақтда Москвада, АФК "Система" компанияси директорлар кенгаши йиғилишида бўлган. Кочарян бу компаниянинг директорлар кенгаши аъзоси ҳисобланади.
Согомоняннинг таъкидлашича, собиқ президент уйига ҳужум қилинганини журналистлардан билган: "Менинг тушунишимча, кимдир граната улоқтириб, қочиб кетган". Унинг айтишича, ҳеч ким жабрланмаган.
"Айтишим мумкинки, ҳеч нарса юз бермади. Билишимча, граната портламаган", деб Согомоняннинг сўзларини келтириб ўтди "Интерфакс" ахборот агентлиги.
Роберт Кочарян Арманистоннинг иккинчи президенти, 1994-1996 йилларда эса тан олинмаган Тоғли Қорабоғнинг биринчи президенти бўлган