Япониялик технологлар 200 граммгача бўлган вазндаги ультраенгил дронлар ишлаб чиқаришди ва уларни яқинда кўп сонли зилзилалардан жабр кўрган Кюсю оролида синовдан ўтказишди. Бу ҳақида "Нихон кэйдзай" ("Никкэй") газетаси хабар қилди.
Манба маълумотларига кўра, Токиодаги Япон картография маркази Табиий офатларни бартараф қилиш бўйича илмий-техник тадқиқотлар институти билан ҳамкорликда дронларнинг бир неча экспериментал моделларини яратишди. Улар Кюсю оролидаги Кумамото префектурасида яқинда рўй берган ер силкинишларидан кейинги талофатларни ўрганиб чиқиш учун тажриба мақсадларида қўлланган.
Газетанинг хабар беришича, шундай дронлардан бири жуда енгил углерод толасидан ясалган ва пенополистерол қатронли тўрт пропеллерни қўлловчи "мульткоптер"дан иборат. Митти учувчисиз қурилма қўл кафтига сиғадиган ҳажмда бўлиб, унинг оғирлиги атиги 199 граммни ташкил қилади.
Дрон GPS навигация сигналларини қабул қилувчи ускуна, компас, 8 миллион пикселли фотокамера билан таъминланган. У 20-30 метр баландликда парвоз қила олади. Унинг ёрдамида замин объектларининг уч ўлчамли тасвирларини яратиш мумкин. Парвоз йўналишини компьютер-ноутбук орқали бошқарилади, дея маълум қилди "Никкэй.