Лондонда «Челси» ва жамоанинг собиқ шифокори Ева Карнейро ўртасидаги суд жараёни давом этмоқда.
«Челси»нинг собиқ бош мураббийи Жозе Моуриньо 2015 йилнинг августида, АПЛнинг 1-турида «Суонси»га қарши кечган ўйин вақтида ушбу 36 ёшли испаниялик шифокорни ҳақоратлаган, кўп ўтмасдан уларнинг можароси Карнейронинг ишдан четлатилиши билан якунланганди.
Ўшанда, уэльсликларга қарши ўйин вақтида шифокорлар жароҳат олган Эден Азарга ёрдам бериш учун майдонга чиққанди. Аммо Моуриньонинг фикрича, футболчининг жароҳати жиддий эмасди ва шифокорлар, шу жумладан Карнейро ҳам бу иши орқали «Челси»га ғалаба қозонишга халақит берган.
Кейинроқ Карнейро клубни бутунлай тарк этди ва Моуриньо омма олдида ўзидан узр сўрашини талаб этди.
«Челси» Карнейрога ярашув учун 1,2 млн фунт миқдорида товон пули таклиф қилди, аммо аёл бу таклифни рад этди.
Карнейро Моуриньони ҳам алоҳида тартибда судга берган.
Карнейро португалиялик мураббий уни камситган, Лондон клуби раҳбарияти эса ноқонуний бўшатган, деб ҳисобламоқда.
Март ойида Карнейро футболдан бутунлай кетгани ва ўз она шаҳри Гибралтардаги тиббий клиникада ишлашни давом эттириши маълум бўлганди.