АҚШда Америка кубоги баҳслари давом этмоқда. Россиянинг "Футбол1" телеканали мусобақа ўйинлари рекламасида АҚШ президентлигига номзод Дональд Трампнинг сўзларидан фойдаланмоқда.
Ушбу миллиардер хорижликларга, айниқса, жанубий америкаликларга мамлакатга кириш учун чекловлар қўйишни режалаштиргани ҳақида бир неча марта баёнот берган. Айнан мана шу мавзудаги маърузада айтилган гаплар реклама учун ишлатилган.
"...Улар мамлакатга яхши ниятда келишмайди. Улар қотиллар".
Бу ерда самолётдан тушиб келаётган Жанубий Америка терма жамоалари футболчилари кўрсатилган.
"...Улар бизнинг чегарани жуда осон босиб ўтишмоқда. Мен бунга йўл қўймайман".
Бу ўринда ҳимоячилардан қийинчиликсиз ўтиб кетаётган Лионель Мессининг ҳаракатлари.
"...Мен уларнинг йўлига девор ўрнатаман".
Бу "олтин сўз" фонида рақибга подкат ташлаётган ҳимоячи тасвирланган.
Эслатиб ўтамиз, Америка Кубогида ярим финалчилар номи аниқ бўлди. Бош соврин учун Аргентина, Чили, АҚШ ва Колумбия терма жамоалари курашни давом эттиришади.
Манба: Tribuna.Uz