Google компанияси ва Осиёнинг бир неча алоқа операторлари Тинч океани тубидан ўтувчи FASTER интернет кабелини ётқизиб бўлди. У АҚШ ва Японияни боғламоқда, деб хабар қилган The Next Web.
Кабелнинг энг юқори ўтказиш салоҳияти сониясига 60 Тбитни ташкил этади. Googleнинг катта вице-президенти Ура Хельцленинг сўзларига кўра, каналнинг қуввати дунёдаги ҳар қандай шу каби кабеллар қувватидан кучлироқдир.
Американинг IT-гиганти мазкур лойиҳани China Mobile International, China Telecom Global, Global Transit, KDDI ва SingTel каби телекоммуникация компаниялари билан ҳамкорликда амалга оширди. Япониянинг NEC компанияси кабелни ётқизиш ва уни лойиҳалашда ёрдам кўрсатган.
FASTER барпо этиш учун 300 млн доллар маблағ сарфлангани хабар қилинмоқда. Лойиҳа бир йиллар аввал бошланган эди.
Мазкур ахборот канали Американинг Орегон штатини Япониянинг Тиба ва Ми префектуралари билан боғлаган.
Қайд этилишича, бу Google компаниясининг тўртинчи сувости кабелидир. Корпорация келгусида ҳам бу каби лойиҳаларни амалга оширишни режалаштирмоқда.
