Уэльс терма жамоаси бош мураббийи Крис Коулмэн Евро-2016 турнири ярим финалида Португалияга қарши кечган 0:2 ҳисобидаги мағлубиятли ўйиндан кейинги фикрларини билдириб ўтди. У ўз жамоасининг ҳамда жамоа ҳужумчиси Гарет Бэйлнинг турнир давомида кўрсатган ўйинларидан мамнун бўлганини таъкидлади.
«Мен жамоам ўйинларидан фахрланаман. Таассуротларимни ифодалашга сўз топа олмаяпман… Ярим финал — бу Уэльс учун катта натижа. Бу муваффақиятни ҳеч ким кутмаганди. Лекин биз бунга эришиш учун 200 фоиз куч билан ҳаракат қилдик.
Бу ўйинда ким биринчи гол урса, ғалаба ўшаники эди. Афсуски бизда имкониятлар бўлмади. Португалияга тан бериш лозим, улар жуда яхши ҳимояланиб, биз учун бўш ҳудудларни қолдиришмади. Биз диққат эътиборни 5 дақиқага сусайтирдик, натижада Португалия бизни зудлик билан жазолади.
Евро давомида мени норози қилган биргина ўйин — Англияга қарши ўйин бўлганди. Ўшанда биз ўз юзимизни йўқотиб қўйгандик. Қолган ўйинларда эса ҳақиқий юзимизни кўрдингиз. Менимча Уэльснинг юзи кўпчиликка ёқди.
Рэмси даражасидаги футболчининг йўқотилиши ҳар қандай терма жамоа мурайббийи учун қайғули бўларди. У жуда маҳоратли футболчи. Бугун биз Португалия ҳимоясини ёриб ўта олмадик. Аарон эса бу ишни қандай уддалашни кўрсатиб қўйганди…
Бэйл? У ҳам инсон. У бор имкониятларини ишга солди. У ҳамишагидек жуда кўп югурди ва майдонда худди қон кечган каби кураш олиб борди. Лекин унинг ёлғиз ўзи ғалаба келтира олмасди. Гарет турнирни ажойиб ўтказди. Мен унининг қаршисида Евро-2016даги ўйинлари учун тиз чўкишга тайёрман ва унга чексиз миннатдорчилигимни билдираман», — дея Коулмэннинг сўзларини келтиради «Чемпионат».
«Португалия ажойиб равишда ҳимояланди. Биринчи голни қўйиб юборганимиздан кейин концентрацияни йўқотдик, футболчилар қўрқиб ўйнай бошлашди… Бахтга қарши тез жазоландик. Биз охиригача курашдик, аммо бирон нарсани ўзгартириш имкони бўлмади. Португалияга омад тилаймиз, финалда ғалаба ёр бўлсин.
Ҳа, бугун Португалиянинг еттинчи рақамли футболчиси зўр ўйнади… Фамилиясини эслай олмаяпман — у жуда зўр сакрар экан! (Кулади)
Агар жиддий айтадиган бўлсак, Роналду — ҳамиша ҳайрон қолдирувчи футболчи. Унинг қай даражадаги савияли футболчи эканини сиз шундоқ ҳам биласиз. Албатта, биз у иккинчи қаватда жуда хавфли эканини билардик… Лекин барибир уни тўхтатиб қола олмадик. Ахир бундай буюк футболчиларни тўхтатиб бўлармиди.
Португалияни кўплар ўйин услуби учун танқид қилишди. Лекин, журналистлар ҳам нимадир ёзиши керакку… Менимча, уларда катта жамоа жамланган. Бугун мен ҳақиқий жамоани кўрдим. Португалия — фақат биргина Криштиану Роналдудан иборат эмас. Бу омилкорлик билан ташкил этилган жамоа. Улар нима исташаётганини яхши билишади. Уларни тўхтатиш осон эмас. Бунга Германия ёки Франция ҳам эришиши қийин. Португалияда Европа чемпиони бўлишга реал имкониятлар мавжуд», деган мураббий.
Манба: Tribuna.uz