Европа Иттифоқи аъзолари бўлган мамлакатлардан чиққан ва "охирги поездга илинмоқчи бўлган" муҳожирлар Бирлашган қиролликнинг ЕИни тарк этгани расман маълум бўлгунича Буюк Британияга қабул қилинмаслиги мумкин. Бу ҳақда Brexit бўйича вазир Дэвид Дэвис маълум қилди.
Вазир ўз лавозимига тайинланганидан кейин The Mail газетасига берган интервьюсида бундай қоида Британияга келадиган европаликларга ҳамда бошқа мамлакатга чиқиб кетган британияликларга тааллуқли бўлишини айтган.
"Биз буни ҳал қилишимиз мумкин. Бунинг турли имкониятлари мавжуд", деган у.
У шунингдек, бу борадаги вазият яхшиланишига умид билдирган.
Бундан олдинроқ, Дэвис Буюк Британиянинг ЕИдан чиқиши 2018 йилнинг декабрида рўй бериши ҳақида маълум қилганди.
Эслатиб ўтамиз, Буюк Британиянинг Европа Иттифоқи таркибидан чиқиши юзасидан ўтказилган референдумда мамлакат аҳолисининг ярмидан кўпроғи ушбу ташаббусни ёқлаб чиқди. Шу муносабат билан Евроиттифоқ Британияни ушбу жараённи тезроқ бошлашга ундаб келмоқда.