Озарбайжон марказий сайлов қўмитаси (МСҚ) 27 июлда мамлакат конституциясига ўзгартиришлар киритиш бўйича референдумга тайёргарлик кўриш бўйича кампанияга старт берди. Бу референдум 26 сентябрда бўлиб ўтади.
МСҚ котиби Арифа Мухтарованинг айтишича, референдумнинг якуний натижалари 21 октябрда маълум қилинади.
Озарбайжон конституциясига ўзгартиришлар киритиш ташаббуси мамлакат президенти Илҳом Алиев томонидан билдирилди. У томонидан таклиф қилинган лойиҳа конституциянинг 29 та моддасига ўзгартириш киритишни кўзда тутади. Жумладан, президент ваколатлари муддатини 5 йилдан 7 йилгача ошириш таклиф қилинмоқда. Бундан ташқари, конституциядан Озарбайжон президенти этиб 35 ёшдан кичик бўлмаган фуқаро сайланиши мумкинлиги ҳақидаги қоида олиб ташланмоқчи.
Лойиҳа шунингдек биринчи вице-президент ва вице-президент лавозимлари киритилишини назарда тутади. Шунингдек, президентга Миллий межлисни (парламент) тарқатиб юбориш ва навбатдан ташқари президентлик сайловларини эълон қилиш ҳуқуқини бериш таклиф қилинмоқда. Шунингдек, ҳужжатда мамлакат фуқароларига парламентга ҳозирдагидек 25 ёшдан эмас, балки 18 ёшдан сайланиш ҳуқуқини тақдим қилувчи банд ҳам бор.
Озарбайжонда охирги марта конституцион референдум 2009 йилда ўтказилганди. Унинг натижаларига кўра, конституцияга бир шахснинг 2 мартадан кўпроқ марта президент этиб сайланишига йўл қўювчи ўзгартириш киритилганди.