Туркия ИИВ маълумотига кўра, 15 июль оқшомидаги давлат тўнтаришига уринишдан кейин бошланган ялпи тозалаш ишлари давомида 8 минг нафардан ортиқ киши ҳибс қилинган.
Reuters агентлиги маълумотига кўра, тадбирлар давомида жами 15 мингдан ортиқ киши исёнга алоқадорликда гумон қилиниб қўлга олинган, шундан 10 минг нафардан ортиғи ҳарбийлардир.
Бундан олдинроқ, Туркия ҳукумати исёнда 35та қирувчи самолёт ҳамда 239та зирҳли машинадан фойдаланилгани ҳақида хабар берганди.
15 июль оқшомида Туркиянинг Истанбул ва Анқара шаҳарларига танклар олиб кирилиб, давлат тўнтариши амалга оширилгани эълон қилинди. 16 июль тонгида исён бостирилди.
Тартибсизликлар вақтида тинч аҳоли вакилларидан 246 киши ҳалок бўлган ва 2 мингдан ортиқ киши жароҳатланган. Исёнчиларнинг йўқотишлари ҳисоби қилинмаган.