АҚШ президентлиги учун Демократик партиядан номзод Ҳиллари Клинтон ва Россия етакчиси Владимир Путин муносабатлари ўзаро ишончсизликка асосланган, дея фикр юритган Эми Феррис-Ротман The Wall Street Journal газетасида эълон қилган мақоласида.
Шарҳловчининг сўзларига кўра, ўтган биринчи телебаҳслар чоғида Клинтон Путин ҳақида шубҳали фикрларини билдирган. Демократ номзоднинг айтишича, Путин «узоқ ва мураккаб ўйин ўйнамоқда». Бироқ, Кремль ҳам собиқ давлат котибига унчалик ишонмайди, албатта.
Ҳукумат доираларидаги манбалар ва собиқ дипломатларнинг таъкидларича, Кремль маъмурияти Клинтон мисолида ошкора демократлаштириш жараёнини олиб борувчи инсонни кўрмаяпти. Хусусан, россиялик мулозимлар Вашингтонни «тузумни ўзгартириш» сиёсатини, жумладан Москвага қарши ҳам олиб бораётганликда бир неча бор айблаган эди. Уларга кўра, АҚШ шундай фаолият юритувчи «демократик кучлар»ни молиялаштирмоқда.
Бу ёқтирмаслик, шунингдек, Клинтон хонимнинг айрим россиялик етакчи сиёсатчи ва дипломатлар, хусусан, Сергей Лавров ўртасидаги «аччиқ» шахсий муносабатлари билан ҳам изоҳланади, дейилади мақолада.
«У ҳеч қачон Путин ва Лавров билан ишлашни хуш кўрмаган. Ўйлашимча, бу ҳиссиётлар у томонда ҳам шундай», — деган россиялик сиёсатчи Федор Лукьянов.
Шарҳловчининг ёдга олишича, 2009 йили давлат котиби вазифасига киришган Клинтоннинг илк вазифаларидан бири Россия билан муносабатларни «қайта кучайтириш» бўлган эди. Бироқ, аввалбошданоқ бу уринишлар самара бермади: Клинтон Лавров билан илк учрашувида рамзий тугмани ҳадя қилган, унда эса, тасодифанми, ишқилиб, рус тилидаги «перезагрузка» ўрнига «перегрузка» сўзи битилган эди. Албатта, бу ҳолат учрашув кайфиятига таъсир этмади, аммо орадан 4 йил ўтгач, Ҳиллари давлат котиби лавозимини тарк этиши муносабати билан президент Обамага битган мактубида Москва билан алоқалар энг қуйи даражага тушганини эътироф этганди.
Мақолада, Россиянинг демократлар номзодини ёқтирмаслигига оид яна битта сабаб келтирилган. Унга кўра, расмий Москва АҚШ раҳбарлигини аёл киши эгаллашини хоҳламайди. Масалан, Россия либерал-демократлари етакчиси Владимир Жириновскийга кўра, Клинтон хоним «раҳбар аёлларни ёқтирмайдиган араблар, турклар ва бошқа давлатлар билан қандай муомала қилмоқчи?».
Шунга қарамай, муаллифнинг таъкидлашича, Путин бошқа аёл раҳбарлар, жумладан Ангела Меркель, Дилма Руссефф каби сиёсатчилар билан ўзаро ҳамкорлик қилиш бўйича кўп йиллик тажрибага эга.
