Айни вақтда Қонунчилик палатасида иш қизғин бормоқда. Хусусан, депутатлар янги таҳрирдаги “Касаба уюшмалари, уларнинг ҳуқуқлари ва фаолиятининг кафолатлари тўғрисида”ги Ўзбекистон Республикаси қонуни лойиҳаси устида ишлашмоқда.
Олий Мажлис Қонунчилик палатаси Кенгаши ҳузуридаги киритилаётган қонун лойиҳаларини ва бошқа норматив-ҳуқуқий ҳужжатлар лойиҳаларини кўриб чиқишни ташкил этиш бўйича Мувофиқлаштирувчи гуруҳ томонидан рўйхатга олинган “Касаба уюшмалари, уларнинг ҳуқуқлари ва фаолиятининг кафолатлари тўғрисида”ги қонунга ўзгартишлар киритиш тўғрисида”ги Ўзбекистон Республикаси қонуни лойиҳасига Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси масъул этиб тайинланди. Қўмита ҳузурида даставвал экспертлар гуруҳи тузилди. Ҳозирги вақтда ушбу ишчи гуруҳи қонун лойиҳасини дастлабки ўқишга тайёрлаш устида фаолият олиб бормоқда.
– Қонун лойиҳасининг қабул қилиниши ижтимоий-меҳнат соҳасида касаба уюшмалари эркинлигининг кафолатларини мустаҳкамлайди, – дейди қўмита аъзоси Отабек Абдуғаниев. – Мазкур ҳужжат Халқаро меҳнат стандартлари, жумладан, Халқаро меҳнат ташкилоти конвенцияларини миллий қонунчиликка самарали имплементация қилишда, касаба уюшмалари мустақиллиги кафолатларини таъминлаш, фаолиятининг ҳуқуқий ва иқтисодий асосларини такомиллаштиришга доир зарур ҳуқуқий базани шакллантириш, фуқароларнинг меҳнат ва ижтимоий-иқтисодий ҳуқуқлари ҳимоясини кучайтириш, ижтимоий-меҳнат соҳасида қонунийликни таъминлаш ва жамоатчилик назоратини мустаҳкамлашга хизмат қилади.
Манба: parliament.gov.uz
