«Эвертон» жамоасининг эквадорлик ҳужумчиси Эннер Валенсия ўзининг 5 ёшли қизи учун алимент тўламаётгани юзасидан бошланган можароларга муносабатини билдириб ўтди.
«Ўтган йили мен ўз қизимга ҳомийлик қилиш юзасидан судга мурожаат қилдим. Мен уни ўзим билан Англияга олиб келмоқчи эдим, у мен билан шу ерда яшаши ва яхши таълим олишини истадим.
Декабрда суд менга оталик ҳуқуқини тақдим этди ва ҳар ойда унинг учун рафиқамга алимент тўлаб боришим зарурлиги ҳақида ҳукм чиқарди. Суднинг бу қарори эса менинг қизим онаси томонидан доимий равишда жисмоний ва руҳий қийноқларга дучор бўлишини англатарди.
Бундан ташқари, собиқ рафиқам мен тўлаган пулларни машина ва қимматбаҳо буюмлар харид қилиш, саёҳатларга чиқиш учун сарфлаши аниқ», — дея ёзган Валенсия ўз твиттерида.
Эслатиб ўтамиз, ушбу футболчи терма жамоаси ўйинларида иштирок этиш учун ватанига келганида уни ҳуқуқ тартибот органлари таъқиб қилишди.
Бир вазиятда у майдонда симуляция ишлатиб, шифокорлар ёрдамида таъқибдан қутулишига тўғри келди.
Унга 17 минг доллар миқдоридаги алиментни тўламаслик айби қўйилмоқда. Бу хабарлардан кейин кўпчиликда йиллик маоши миқдори 2,1 млн евро бўлган футболчи бу арзимас миқдордаги маблағни тўлашдан нега қочаётгани борасида саволлар пайдо бўлганди.
